‘8 தோட்டாக்கள்’ வெற்றி நடிக்கும் 'பம்பர்'.. முதல்முறை கைகோர்க்கும் பிரபல BIGGBOSS ஹீரோயின்!

நாயகனாக வெற்றி..

கேரள மாநில லாட்டரியை மையமாகக் கொண்ட 'பம்பர்' என்கிற இந்த தமிழ் திரைப்படத்தில் ‘8 தோட்டாக்கள்’ மற்றும் ‘ஜீவி’ புகழ் வெற்றி கதாநாயகனாக நடிக்கிறார்.

இயக்குநர் எம்.செல்வக்குமார் 

வேதா பிக்சர்ஸ் பேனரில் சு. தியாகராஜா தயாரிக்கும் இப்படத்தை இயக்குநர்கள் மீரா கதிரவன் மற்றும் ‘கொம்பன்’ முத்தையா உள்ளிட்டவர்களிடம் பணியாற்றிய அனுபவமுள்ள இயக்குநர் எம்.செல்வக்குமார் இயக்குகிறார். இப்படத்துக்கு கோவிந்த் வசந்தா இசையமைக்க, கார்த்திக் நேத்தா பாடல்களை எழுதுகிறார்.

சபரிமலை முதல் தூத்துக்குடி வரை படப்பிடிப்பு 

இப்படத்தின் முதல் கட்ட படப்பிடிப்பு எருமேலியில் இருந்து சபரிமலைக்கு செல்லும் பெருவழிப்பாதை மற்றும் அதனை சுற்றியுள்ள பகுதிகளில் கேரள அரசின் உரிய அனுமதியுடன் நிறைவடைந்தது. இப்படத்தின் அடுத்தக்கட்ட படப்பிடிப்பு விரைவில் தொடங்கி பிப்ரவரி மாதம் நிறைவடையும். சில முக்கிய காட்சிகள் தூத்துக்குடியில் படமாக்கப்படவுள்ளன.

‘பிக்பாஸ்’ புகழ் ஷிவானி

இப்படத்தின் கதாநாயகியாக ‘பிக்பாஸ்’ புகழ் ஷிவானி நடிக்கிறார். சுவாரசியமான கதாபாத்திரம் ஒன்றை தங்கதுரை ஏற்றுள்ளார். படத்தை பற்றி பேசிய இயக்குநர் செல்வக்குமார், “கேரள பம்பர் லாட்டரி தான் இப்படத்தின் கதைக்களமாகும். வெற்றி கதாநாயகனாகவும், அதற்கு இணையான கதாபாத்திரத்தில் நடிகர் ஹரீஷ் பெரடியும் நடிக்கின்றனர்” என்று குறிப்பிட்டுள்ளார்.

படத்தின் ஒளிப்பதிவை நெடுநல்வாடை, எம்.ஜி.ஆர் மகன், ஆலம்பனா மற்றும் கடமையை செய் ஆகிய திரைப்படங்களின் ஒளிப்பதிவாளர் வினோத் ரத்தினசாமி கையாள்கிறார். படத்தொகுப்புக்கு மு.காசிவிஸ்வநாதன் பொறுப்பேற்றுள்ளார்.

Also Read: ஆந்திராவை உலுக்கிய துணை நடிகை ஜோதி ரெட்டி மரணம்.. புஷ்பா படத்துல நடிச்சிருக்காங்களா?