'கொரோனா வைரஸ் பரவலை கட்டுப்படுத்தும் தண்ணீர்!'... 'வெளியாகியுள்ள புதிய ஆய்வு முடிவு'...

கொரோனா வைரஸ் பரவலை தண்ணீரால் கட்டுப்படுத்த முடியும் என ஆய்வு ஒன்றில் தெரியவந்துள்ளது.

உலகம் முழுவதும் பெரும் பாதிப்பை ஏற்படுத்திவரும் கொரோனாவுக்கு தடுப்பு மருந்து கண்டுபிடிக்க பல நாடுகளும் முயற்சித்துவரும் நிலையில், ரஷ்யாவில் உள்ள வெக்டார் மாநில வைராலஜி மற்றும் பயோடெக்னாலஜி ஆராய்ச்சி மையம் கொரோனா வைரஸ் பரவலை தண்ணீரால் கட்டுப்படுத்த முடியும் என ஆய்வு செய்து கூறியுள்ளது.

குறிப்பாக அதில் கொதிக்கும் வெப்பநிலையில் உள்ள தண்ணீர் உடனடியாக கொரோனா வைரஸை முழுமையாக அழிக்கக்கூடும் எனக் கூறப்பட்டுள்ளது. 90 மணி நேர வைரஸ் துகள்கள் அறை வெப்பநிலையில் உள்ள நீரில் 24 மணி நேரத்திலும், 99.9 சதவீதம் 72 மணி நேரத்திலும் இறக்கின்றன எனவும் கூறப்பட்டுள்ளது. இந்த ஆராய்ச்சி முடிவுகள், கொரோனா வைரஸின் பின்னடைவு நேரடியாக நீரின் வெப்பநிலையைப் பொறுத்தது என்பதைக் குறிக்கிறது.

கொரோனா வைரஸ் சில நிபந்தனைகளில் தண்ணீரில் வாழ முடியும் என்றாலும், கடல் அல்லது புதிய நீரில் வைரஸ் பெருக்கமடையாது என இந்த ஆய்வு கூறுகிறது. எஃகு, லினோலியம், கண்ணாடி, பிளாஸ்டிக் மற்றும் பீங்கான் பரப்புகளில் வைரஸ் 48 மணி நேரம் வரை கூட செயல்பட முடியும் எனவும் இந்த ஆய்வில் தெரியவந்துள்ளது.

மேலும் 30 சதவிகித செறிவு கொண்ட எத்தில் மற்றும் ஐசோபிரைல் ஆல்கஹால்கள் அரை நிமிடத்தில் வைரஸின் ஒரு மில்லியன் துகள்கள் வரை கொல்லக்கூடும் எனவும், குளோரின் கொண்ட கிருமிநாசினிகள் 30 விநாடிகளுக்குள் கொரோனா வைரஸின் மேற்பரப்பை முழுமையாக அழிக்க முடியும் எனவும் இந்த ஆய்வு மூலம் கண்டறியப்பட்டுள்ளது.