“சென்னையில் களைகட்டும் புத்தகத் திருவிழா!”.. “மெட்ரோ கார்டு வெச்சிருக்கீங்களா?” ..“உங்களுக்கு மட்டும் ஒரு ஸ்பெஷல் ஆஃபர்!”

43 வது சென்னை புத்தகக் கண்காட்சி நந்தனம் ஒய்.எம்.சி ஏ உடற்கல்வியியல் கல்லூரி மைதானத்தில் இன்று தொடங்கி வருகிற 21-ஆம் தேதி வரை நடைபெற இருக்கிறது.

புத்தகக் கண்காட்சியை முதலமைச்சர் எடப்பாடி பழனிசாமி இன்று மாலை ஆறு மணிக்கு தொடங்கி வைக்கின்றார். விழாவில் அமைச்சர்கள் உள்ளிட்ட பலர் பங்கேற்கின்றனர். தொடக்க விழாவில், சிறந்த பதிப்பாளர், புத்தக விற்பனையாளர், சிறந்த அறிவியல் நூல் உள்ளிட்ட விருதுகளை முதலமைச்சர் வழங்க உள்ளார்.

கோடிக்கணக்கான புத்தகங்கள் இடம்பெறவிருக்கும் இந்த புத்தகக் கண்காட்சி, விடுமுறை தினங்களில் காலை 11 மணி முதல் இரவு 9 மணி வரையிலும், வேலைநாட்களில் மதியம் மூன்று மணி முதல் இரவு 9 மணி வரையும் திறந்திருக்கும் என்று தெரிவிக்கப்பட்டுள்ளது.

புத்தகக் கண்காட்சியின் சிறப்பம்சமாக 'கீழடி - ஈரடி' என்ற தலைப்பில் தொல்லியல் துறை சார்பில் 3 ஆயிரம் சதுர அடி பரப்பளவில் அரங்கம் அமைக்கப்பட்டுள்ளது. இம்முறை 20 லட்சம் வாசகர்கள் வருவார்கள் என எதிர்பார்ப்பதாக கண்காட்சி அமைப்பாளர்கள் கூறி உள்ளனர். சுமார் 20 கோடி ரூபாய் அளவுக்கு புத்தகங்கள் விற்பனை ஆகும் என எதிர்பார்ப்பதாகவும் அவர்கள் நம்பிக்கை வெளியிட்டுள்ளனர்.

இந்த புத்தகக் கண்காட்சிக்கான நுழைவு கட்டணமாக ரூ.10 வசூலிக்கப்படுகிறது. பள்ளி, கல்லூரி மாணவர்களுக்கு நுழைவுக் கட்டணம் இல்லை எனவும், அவர்களுக்கான அனுமதிச்சீட்டு அந்தந்த கல்வி நிறுவனங்களினால் வழங்கப்படும் எனவும் தெரிவிக்கப்பட்டுள்ளது. மேலும் மெட்ரோ ரயில் மூலம் கண்காட்சிக்கு வருகிறவர்களுக்கு நுழைவுக் கட்டணம் இல்லாமல்  பயண அட்டையைக் காட்டி இலவசமாக அனுமதி பெறலாம் என்றும் தெரிவிக்கப்பட்டுள்ளது.