‘இப்டிதான் நிலவில் தரையிறங்கும் விக்ரம் லேண்டர்’.. பிரமிக்க வைத்த இஸ்ரோ வெளியிட்ட வீடியோ..!

சந்திராயன் -2 விண்கலத்தில் இருந்து விக்ரம் லேண்டர் கருவியானது நள்ளிரவு 1:30 முதல் 2:30 மணிக்குள் நிலவில் தரையிறங்கும் என இஸ்ரோ தெரிவித்துள்ளது.

கடந்த ஜூலை மாதம் இஸ்ரோ சார்பில் நிலவின் தென் துருவத்தை ஆய்வு செய்ய சந்திராயன் -2 விண்கலம் விண்ணில் ஏவப்பட்டது. இதனை அடுத்து புவி சுற்று வட்டப்பாதையில் நிலை நிறுத்தப்பட்ட விண்கலம், படிப்படியாக புவி வட்டப்பாதையில் 5 முறை உயர்த்தப்பட்டது. இதனை அடுத்து கடந்த ஆகஸ்ட் மாதம் 14 -ம் தேதி சந்திராயன் -2  விண்கலம் புவி வட்டப்பாதையில் இருந்து பிரிந்து நிலவை நோக்கி பயணிக்க ஆரம்பித்தது. இதனைத் தொடர்ந்து கடந்த ஆகஸ்ட் மாதம் 20 -ம் தேதி நிலவின் சுற்றுவட்டப்பாதையை சந்திராயன் -2 அடைந்தது. இதன்பின்னர் கடந்த 2 -ம் தேதி விண்கலத்தில் இருந்து விக்ரம் லேண்டர் தனியாக பிரிந்து நிலவின் மேற்பரப்பை நோக்கி பயணிக்க ஆரம்பித்தது.

இந்நிலையில் இன்று(06.09.2019) நள்ளிரவு 1:30 மணி முதல் 2:30 மணிக்குள் விக்ரம் லேண்டர் நிலவில் தரையிறங்கும் என இஸ்ரோ விஞ்ஞானிகள் தெரிவித்துள்ளனர். அதனைத் தொடர்ந்து அதிகாலை 5:30 மணி முதல் 6:30 மணிக்குள் பிரக்யான் ரோவர் விக்ரம் லேண்டரில் இருந்து வெளியே வந்து ஆய்வை தொடங்கும் என தெரிவிக்கப்பட்டுள்ளது. இந்நிலையில் விக்ரம் லேண்டர் நிலவில் தரையிறங்கும் மாதிரி வீடியோ ஒன்றை இஸ்ரோ தங்களது ட்விட்டர் பக்கத்தில் வெளியிட்டுள்ளது.

Watch this video to find out more about Vikram — Chandrayaan 2’s Lander — and the different stages of its journey to the Moon’s south polar region! https://t.co/2qBLe0T710#ISRO #Moonmission #Chandrayaan2

— ISRO (@isro) September 5, 2019