அடேங்கப்பா! ஜனவரில மட்டும் '16 நாள்' லீவாம்... எந்தெந்த தேதில.... 'பேங்க்' இருக்காதுன்னு தெரிஞ்சுக்கங்க!
முகப்பு > செய்திகள் > இந்தியாஜனவரி மாதம் மட்டும் மொத்தம் 16 நாட்கள் வங்கிகளுக்கு விடுமுறை என, தகவல்கள் வெளியாகி இருக்கின்றன.
தமிழ்நாடு மட்டுமின்றி இந்தியா முழுவதும் வங்கிகளுக்கு ஜனவரியில் மட்டும் மொத்தம் 16 நாட்கள் விடுமுறை தினங்கள் வருகின்றன. குறிப்பாக புத்தாண்டு, பொங்கல், சனி-ஞாயிறு என தமிழகத்துக்கு ஏராளமான விடுமுறை தினங்கள் வருகின்றன. அந்த 16 நாட்கள் எந்த தேதி மற்றும் கிழமையில் வருகின்றன என்பதை இங்கே பார்க்கலாம்.
வருடத்தின் முதல் நாளான இன்று அரசு விடுமுறை என்பதால் அனைத்து வங்கிகளும் இயங்காது. ஜனவரி 2-ம் தேதி மன்னம் ஜெயந்தியை முன்னிட்டு கேரளாவிலும், குரு கோவிந்த் சிங் ஜெயந்தியை முன்னிட்டு சில மாநிலங்களிலும் வங்கிகளுக்கு விடுமுறை அளிக்கப்பட்டுள்ளது. ஜனவரி 11-ம் தேதி சனிக்கிழமை மிசினரி தினத்தை முன்னிட்டு மிசோரம் மாநிலத்தில் மட்டும் வங்கிகளுக்கு விடுமுறை அளிக்கப்படும். ஜனவரி 15-ம் தேதி பொங்கல் பண்டிகையை முன்னிட்டு தமிழகத்திலும், மகர சங்கராந்தி, போகலி பிகு, துசு பூஜா, ஹடாகா பண்டிகை ஆகியவற்றை முன்னிட்டு ஆந்திரா, தெலங்கானா, கர்நாடகா, அஸ்ஸாம், பஞ்சாப், மகாராஷ்டிரா ஆகிய மாநிலங்களில் வங்கிகளுக்கு விடுமுறை அறிவிக்கப்பட்டுள்ளது.
ஜனவரி 16-ம் தேதி திருவள்ளுவர் தினத்தை முன்னிட்டு தமிழக வங்கிகளுக்கு விடுமுறை அளிக்கப்படும். ஆந்திரா, புதுச்சேரியிலும் அன்று வங்கிகளுக்கு விடுமுறைதான். ஜனவரி 17-ம் தேதி உழவர் திருநாள் என்பதால் அன்று தமிழகத்திலும் புதுச்சேரியிலும் வங்கிகள் செயல்படாது. ஜனவரி 23-ம் தேதி நேதாஜி சுபாஸ் சந்திர போஸ் பிறந்தநாளை முன்னிட்டு மேற்குவங்கம், திரிபுரா, ஒடிசா, அஸ்ஸாம் ஆகிய மாநிலங்களில் வங்கிகளுக்கு விடுமுறை. ஜனவரி 25-ம் தேதி சோனம் லோச்சர் பண்டிகையை முன்னிட்டு சிக்கிமிலும், இமாசலப் பிரதேச மாநில நாளை முன்னிட்டு இமாசலப் பிரதேச வங்கிகளும் இயங்காது.
ஜனவரி 25-ம் தேதி நான்காவது சனிக்கிழமை என்பதால் அன்று வழக்கம்போல வங்கிகளுக்கு விடுமுறை. ஜனவரி 30-ம் தேதி வசந்த் பஞ்சமியை முன்னிட்டு சில மாநிலங்களில் வங்கிகள் இயங்காது. ஜனவரி 31-ம் தேதி மே டாம் மே பி பண்டிகையை முன்னிட்டு அஸ்ஸாம் மாநில வங்கிகளுக்கு விடுமுறை அறிவிக்கப்பட்டுள்ளது. ஜனவரி 26 ஞாயிற்றுக்கிழமை என்பதால் அன்று வங்கிகள் இயங்காது. மற்ற ஞாயிற்றுக் கிழமைகளிலும் வழக்கம்போல வங்கிகளுக்கு விடுமுறை என்பது குறிப்பிடத்தக்கது.