விஜே பிரியங்கா விஜய் டிவியின் பல முன்னணி ரியாலிட்டி ஷோக்களில் ஆங்கரிங் செய்ததன் மூலம் பலருக்கும் பிரியமானவரானார்.
ஷோ நடக்கும் பொழுது தனக்கே உரிய இயல்பால் காமெடி செய்து அரங்கத்தை அதிர வைக்கும் பிரியங்கா மிகவும் இலகுவாக ஒரு ஷோவை மிகவும் கலகலப்பாகக் கொண்டு செல்வதில் வல்லவர். இந்நிலையில் அப்படியே தான் தற்போது பிக்பாஸ் வீட்டிலும் பிரியங்கா இருக்கத் தொடங்கியிருக்கிறார்.
ஆம், பிக்பாஸ் ஐந்தாவது சீசன் நிகழ்ச்சி அக்டோபர் 3-ஆம் தேதி ஞாயிற்றுக்கிழமை மாலை 6 மணிக்கு தொடங்கியது. இந்த நிகழ்ச்சியின் முதல் நாளன்று பிக் பாஸ் போட்டியாளர்கள் அறிமுகப்படுத்தப்பட்டு பிக் பாஸ் வீட்டுக்குள் அனுப்பப்பட்டனர். அந்த வரிசையில் பிக் பாஸ் வீட்டுக்குள் கிட்டத்தட்ட பதினெட்டு போட்டியாளர்கள் வந்துவிட்டனர்.
இவர்களுடன் நிரூப் ஆனந்த் என்கிற போட்டியாளரும் பிக்பாஸ் வீட்டுக்குள் இருக்கிறார். இவர் அதிக தலைமுடி வைத்திருந்தார். அவரைப்பார்த்து பிரியங்கா வியந்தபடி பேச, அதே வீட்டுக்குள் இருக்கும் சின்னத்திரை நடிகர் ராஜு மற்றும் நடிகர் வருண் பிரியங்காவை பார்த்து உங்கள் தலை முடிக்கு என்ன என்று கேட்டிருக்கிறார்கள்.
அதற்கு பிரியங்காவோ, “என்னப்பா இப்படி கேட்டுட்டீங்க.. இதெல்லாம் விக் முடிப்பா!”.. என்பது போல் தலை முடியிலிருந்து சவுரி முடியை ஒவ்வொன்றாக கழட்டி எடுத்து கையில் தருகிறார்.
இதை பார்த்த பலரும், “ஆஹா பிக்பாஸ் வீட்டுக்குள் போன முதல் நாளே விஜய் டிவி விஜே பிரியங்கா தன்னுடைய அட்ராசிட்டியை தொடங்கிவிட்டாரே!” என்று பேசத் தொடங்கி இருக்கின்றனர். இன்று முதல் பிக்பாஸ் இரவு 10 மணிக்கு ஒளிபரப்பாகவிருப்பது குறிப்பிடத்தக்கது.