நடிகர் மகேஷ் பாபுவின் சித்தியும், நடிகையும், இயக்குனருமான விஜய நிர்மலா காலமானார்!

ஆந்திரா திரைப்படத்துறையில் நடிகை, இயக்குனர் மற்றும் தயாரிப்பாளராக பணியாற்றியவர் விஜய நிர்மலா (73). நீண்ட நாட்களாக உடல்நிலை பாதிக்கப்பட்டிருந்த இவருக்கு நேற்று இரவு திடீரென்று மாரடைப்பு ஏற்பட்டுள்ளது. இதையடுத்து, அருகில்ல மருத்துவமனைக்கு சிகிச்சைக்காக கொண்டு செல்லப்பட்டுள்ளார். எனினும், சிகிச்சை பலனின்றி காலமானார்.

தமிழ், தெலுங்கு மற்றும் மலையாளம் ஆகிய மொழிகளில் கிட்டத்தட்ட 200 படங்களில் நடித்துள்ளார். தெலுங்கில் 44 படங்களை இயக்கியுள்ளார். அதிக படங்களை இயக்கிய பெண் இயக்குனர் என்ற பெருமையை பெற்றதோடு கடந்த 2002ம் ஆண்டு கின்னஸ் உலக சாதனை பட்டியலிலும் இடம்பெற்றார்.

தெலுங்கு சினிமாவில் சிறப்பாக பணியாற்றியதற்காக கடந்த 2008ம் ஆண்டு ரகுபதி வெங்கையா விருதினைப் பெற்றார். சிவாஜி கணேசனை இயக்கிய பெருமை இவருக்கு உண்டு. இவரது முதல் கணவர் கிருஷ்ண மூர்த்தி மூலமாக நரேஷ் என்கிற மகன் பிறந்தார். நரேஷ் தற்போது நடிகராக இருக்கிறார். பின்னர், முதல் கணவரை விவாகரத்து செய்து, தெலுங்கு நடிகரான கிருஷ்ணாவை மணந்து கொண்டார். கிருஷ்ணாவிற்கு மகேஷ் பாபு மற்றும் ரமேஷ் பாபு என்று இரு மகன்கள் இருக்கின்றனர். மேலும், ப்ரியதர்ஷினி, பத்மாவதி, மஞ்சுளா ஆகிய மகள்கள் இருக்கின்றனர் என்பது குறிப்பிடத்தக்கது.

கடந்த 1950ம் ஆண்டு வெளிவந்த மச்ச ரேகை என்ற தமிழ் படத்தில் குழந்தை நட்சத்திரமாக சினிமாவில் அறிமுகமானார். அப்போது அவருக்கு 7 வயது. அதன் பிறகு 1957ம் ஆண்டு 11வது வயதில், பாண்டுரங்க மகாத்மியம் என்ற தெலுங்கு படத்தில் நடித்துள்ளார். மலையாளத்தில் பார்கவி நிலையம் படத்திலும், ஆந்திராவில் ரங்குல் ராட்டினம் என்ற படத்திலும் நடித்துள்ளார்.

இவர், தமிழில் "எங்க வீட்டுப் பெண்" திரைப்படம் மூலமாக அறிமுகமானார். அதைத் தொடர்ந்து, தமிழ் படங்களான "பணமா பாசமா", என் அண்ணன், ஞான ஒளி மற்றும் உயிரா மானமா போன்றவற்றில் நடித்துள்ளார். இவர் 1977இல் வெளிவந்த "சாக்‌ஷி" என்கிற தெலுங்குப் படத்தில் நடித்த போது தன் இரண்டாவது கணவரான நடிகர் கிருஷ்ணாவை சந்தித்தார். பிறகு இருவரும் சேர்ந்து 47 திரைப்படங்களில் நடித்துள்ளனர்.

இவர் 1977இல் வெளிவந்த "சாக்‌ஷி" என்கிற தெலுங்குப் படத்தில் நடித்த போது தன் இரண்டாவது கணவரான நடிகர் கிருஷ்ணாவை சந்தித்தார். பிறகு இருவரும் சேர்ந்து 47 திரைப்படங்களில் நடித்துள்ளனர். இவர் நடித்த "சாக்‌ஷி" திரைப்படம் இவருக்கு இயக்குனராகும் விருப்பத்தை தூண்டியது என்பது குறிப்பிடத்தக்கது.

இந்த நிலையில், நேற்று இரவு மாரடைப்பு ஏற்பட்ட நிலையில் காலமானார். இதை தொடர்ந்து இன்று காலை 11 மணிக்கு அவரது இல்லத்திற்கு அவரது உடல் கொண்டு வரப்பட்டு பொதுமக்களின் அஞ்சலிக்காக வைக்கப்படுகிறது. தொடர்ந்து நாளை காலை அவரது உடலுக்கு இறுதி அஞ்சலி செய்யப்படுகிறது. விஜய நிர்மலா மறைவுக்கு பலரும் அஞ்சலி செலுத்தி வருகின்றனர் என்பது குறிப்பிடத்தக்கது