சட்டமன்ற உறுப்பினர் உதயநிதி ஸ்டாலின் தமிழக அமைச்சராக பொறுப்பேற்றுள்ள நிலையில் இனி திரைப்படங்களில் நடிக்க போவதில்லை என்று செய்தியாளர்களிடம் தெரிவித்துள்ளார்.
சட்டமன்ற உறுப்பினர் உதயநிதி ஸ்டாலின், தற்போது திமுக இளைஞரணி தலைவராகவும் சேப்பாக்கம் திருவல்லிக்கேணி சட்டமன்ற உறுப்பினராகவும் உள்ளார். இதேபோல் உதயநிதி ஸ்டாலின் சினிமாவிலும் நடித்தும் திரைப்படங்கள் தயாரித்தும் வந்தார்.
இந்நிலையில் உதயநிதி ஸ்டாலின் தமிழக அமைச்சராக இன்று (டிசம்பர் 14-ஆம் தேதி) திமுக கழக நிர்வாகிகள், பொறுப்பாளர்கள், உறுப்பினர்களின் ஒத்துழைப்பு மற்றும் ஆதரவோடு பொறுப்பேற்றார். தமிழக ஆளுநர் ரவி, உதயநிதிக்கு பதவிப் பிரமாணம் மற்றும் ரகசிய காப்பு பிரமாணம் செய்து வைத்தார். மு.க. ஸ்டாலின் தலைமையிலான அமைச்சரவையில் 35-வது அமைச்சராக உதயநிதி ஸ்டாலின் பொறுப்பேற்றார். உதயநிதிக்கு இளைஞர் நலன் மற்றும் விளையாட்டு துறை ஒதுக்கப்பட்டுள்ளது.
இந்நிலையில் திரைப்படங்களில் நடிப்பதை நிறுத்திவிட்டதாகவும் (மாரி செல்வராஜ் இயக்கத்தில் உருவாகும்) மாமன்னன் திரைப்படம்தான் தனது கடைசி படம் என்றும் அமைச்சர் உதயநிதி ஸ்டாலின் செய்தியாளர்களிடையே திட்டவட்டமாக தெரிவித்தார். முன்னதாக, “நடிப்பதை நிறுத்துகிறீர்களா?” என பத்திரிகையாளர்கள் கேட்டதற்கு, “அதுல ஏன் உங்களுக்கு அவ்வளவு கவலை” என கலகலப்பாக கேட்டார்.