சில நாட்களுக்கு முன்பு, பிரபல டோலிவுட் மாஸ் ஹீரோக்களில் ஒருவரான ஜூனியர் என்.டி.ஆர், தனக்கு கோவிட் 19 பாசிடிவ் என்றும் தற்போது தனிமையில் இருப்பதாகவும் தெரிவித்திருந்தார். மேலும் தனது பிறந்த நாளை மே 20 அன்று (நாளை) கொண்டாடுவதால், இது குறித்து ரசிகர்களுக்காக விசேஷமாக ஒரு முக்கியமான அறிவிப்பை வெளியிட்டுள்ளார்.
அதில், மே 20 அன்று தமது பிறந்தநாளுக்கு முன்னதாக, ஜூனியர் என்.டி.ஆர் தமது ரசிகர்களிடம், ‘ஒரு ஹம்பிள் அப்பீல்’ என்ற தலைப்பில் அவர் கூறிய அறிக்கையில், “என் அன்பான ரசிகர்களே, உங்கள் ஒவ்வொருவருக்கும் ஒரு பெரிய நன்றி. உங்கள் செய்திகளையும், வீடியோக்களையும், உங்கள் வாழ்த்துக்களையும் நான் பார்த்தேன். உங்கள் பிரார்த்தனைகள் என்னைத் தொடர்ந்து கொண்டே இருக்கின்றன, இந்த அன்பிற்காக உங்கள் அனைவருக்கும் நான் கடன்பட்டிருக்கிறேன். நான் மிகவும் நலமாக இருக்கிறேன். விரைவில் கொரோனா நெகடிவ் என்பதற்கான சோதனையை செய்வேன்.
ஒவ்வொரு ஆண்டும், எனது பிறந்தநாளை முன்னிட்டு நீங்கள் காட்டும் பாசம் நான் உண்மையிலேயே மதிக்க வேண்டிய ஒன்று. ஆனால் இந்த சவாலான காலங்களில், நீங்கள் எனக்குத் தரக்கூடிய மிகப் பெரிய பரிசு வீட்டிலேயே இருந்து லாக்டவுன் விதிகளைப் பின்பற்றுவதாகும்.
நம் நாடு கோவிட் -19 உடனான போரில் உள்ளது. நம் மருத்துவ சமூகம் மற்றும் முன்னணி தொழிலாளர்கள் தன்னலமற்ற மற்றும் அயராத போரை நடத்தி வருகின்றனர். பலர் தங்கள் அன்புக்குரியவர்களையும் வாழ்வாதாரங்களையும் இழந்துள்ளனர். இது கொண்டாட்டத்திற்கான நேரம் அல்ல. தேவைப்படுபவர்களுடன் நமது ஒற்றுமையைக் காண்பிப்பதற்கான நேரம் இது.
தயவுசெய்து உங்கள் குடும்பத்தினரையும் அன்பானவர்களையும் கவனித்துக் கொள்ளுங்கள். ஒருவருக்கொருவர் ஆதரவளிக்கவும், தேவைப்படுபவர்களுக்கு உதவவும். இவையெல்லாம் முடிந்ததும், கோவிட் -19 மீதான போர் வென்றதும், நாம் ஒன்றாகக் கொண்டாடுவோம். முகமூடி அணியுங்கள். வீட்டிலேயே இருங்கள்!" என குறிப்பிட்டுள்ளார்.