நடிகர் சந்தானம் நடித்த 'டிக்கிலோனா' திரைப்படத்தின் இயக்குநர் கார்த்திக் யோகிக்கும், வினி ஷாமுக்கும் நேற்று முன்தினம் திருச்சியில் திருமணம் நடந்தது.
நடிகர் சந்தானம், யோகிபாபு, மொட்டை ராஜேந்திரன், ஆனந்தராஜ் மற்றும் பலர் நடிப்பில் யுவன் ஷங்கர் ராஜா இசையில் உருவாகியுள்ள திரைப்படம் டிக்கிலோனா. இந்த திரைப்படத்தின் டிரெய்லர் ஏற்கனவே வெளியாகி வரவேற்பைப் பெற்றிருந்தது.
இந்நிலையில், 'டிக்கிலோனா' திரைப்படத்தின் இயக்குநர் கார்த்திக் யோகிக்கும், வினி ஷாமுக்கும் நடந்த இந்த திருமணத்தில், நடிகர் சந்தானம் நேரில் கலந்துகொண்டு வாழ்த்து தெரிவித்தார். நடிகர்கள் காளி வெங்கட், கண்ணன் ரவி (மண்டேலா பட நடிகர்), வத்ஸன் (எங்கேயும் எப்போதும்) ஆகியோரும் நேரில் வாழ்த்து தெரிவித்தனர். தவிர, நடிகர்கள் யோகி பாபு, சதீஷ், சாம்ஸ் ஆகியோர் இணையவழியில் புதுமணத் தம்பதியை வாழ்த்தினர்.
மேலும், கேஜேஆர் ஸ்டூடியோஸ் நிறுவனர் கே.ஜே. ஆர் ராஜேஷ், கிளாப் போர்டு சத்யா மற்றும் டிக்கிலோனா திரைப்படத்தின் ஒட்டுமொத்த குழுவினரும் மணமக்களை வாழ்த்தினர். இந்த திரைப்படத்தை கேஜேஆர் ஸ்டூடியோஸ் மற்றும் சோல்ஜர்ஸ் பிலிம் பேக்டரி இணைந்து தயாரித்துள்ளது.
நடிகர் சந்தானம் மூன்று விதமான கெட் அப்களில் நடிக்கும் திரைப்படம் 'டிக்கிலோனா'. டைம் டிராவலை மையப்படுத்தி நகைச்சுவை திரைப்படமாக உருவாகியுள்ள இந்த படத்தில், 2027-ஆம் ஆண்டிலிருந்து 2020-ஆம் ஆண்டுக்கு வந்து தனது கல்யாணத்தை தடுத்து நிறுத்துவதற்காக சந்தானம், டைம் டிராவல் செய்வதை போல் 'டிக்கிலோனா' திரைப்படம் உருவாக்கப்பட்டுள்ளது.