ஜெயம் ரவி நடித்த ‘மிருதன்’,‘டிக் டிக் டிக்’ திரைப்படங்களை இயக்கிய இயக்குநர் சக்தி சவுந்தர் ராஜன் இயக்கத்தில் ஆர்யா நடித்துவரும் ‘டெடி’ திரைப்படத்தில் முக்கிய கதாபாத்திரத்தில் ‘90ML’ நடிகை நடித்துள்ளார்.
ஸ்டூடியோ க்ரீன் நிறுவனம் தயாரிப்பில் ஆர்யா நடித்து வரும் ‘டெடி’ திரைப்படத்தில் அவருக்கு ஜோடியாக ஆர்யாவின் மனைவி சாயீஷா நடித்துள்ளார். மேலும், கருணாகரன், சதீஷ் ஆகியோருடன் பிரபல திரைப்பட இயக்குநர் மகிழ்திருமேனி இப்படத்தில் முக்கிய கதாபாத்திரம் ஒன்றில் நடிக்கிறார். ‘டெடி’ திரைப்படத்தின் மூலம் அவர் தமிழ் சினிமாவில் நடிகராக அறிமுகமாவுள்ளது குறிப்பிடத்தக்கது.
இந்நிலையில், ஓவியா நடிப்பில் வெளியான ‘90ML’ திரைப்படத்தில் 5 பெண்களில் ஒருவராக நடித்திருந்த மசூம் ஷங்கர் முக்கிய கதாபாத்திரத்தில் நடித்திருப்பதாக இயக்குநர் தனது ட்விட்டர் பக்கத்தில் அறிவித்துள்ளார்.
மேலும், இந்த படத்தில் தனக்கு வாய்ப்பளித்ததற்கு நன்றி தெரிவித்ததுடன், ஆர்யா, கருணாகரன் உள்ளிட்டோருடன் நடித்த அனுபவத்தை வார்த்தைகளால் விவரிக்க முடியாது எனவும் மசூம் தெரிவித்துள்ளார்.