‘5 ரூபாய் இட்லிக்கு 20 வகை சட்னி’.. கேட்டாலே அசர வைக்கும் லிஸ்ட்.. ஹோட்டல் ‘பெயர்’ கூட அதுக்கு ஏத்த மாதிரியே இருக்கே..!

திருச்சியில் இட்லிக்கு 20 வகையான சட்னி கொடுத்து வியாபாரி ஒருவர் வாடிக்கையாளர்களை கவர்ந்து வருகிறார்.

திருச்சியை அடுத்த திருவெறும்பூர் பர்மா காலனி ஜெய்நகர் சாலையில் வீட்டின் மாடியில் ‘நினைவூட்டும் இட்லி கடை’ என்ற ஹோட்டல் அமைந்துள்ளது . இந்த பெயருக்கு ஏற்றவாறு இங்கு ஒரு முறை சாப்பிட்டால் அது நினைவில் இருந்து நீங்காது என வாடிக்கையாளர்கள் தெரிவிக்கின்றனர். அப்படி இந்த ஹோட்டலில் என்ன ஸ்பெ‌ஷல் என்றால், இங்கு விற்கப்படும் ஒரு இட்லியின் விலை ரூ.5, ஆனால் அதற்கு 20 வகையான சட்னிகள் வழங்கப்படுகிறது.

கேட்டாலே வியக்க வைக்கும் அளவுக்கு தக்காளி, கத்தரிக்காய், காரட், கடலைப்பருப்பு, பொட்டுக்கடலை, மிளகாய், புதினா, மல்லி, சர்க்கரை, நாட்டு சர்க்கரை, சின்ன வெங்காயம், பெரிய வெங்காயம், பூண்டு, இஞ்சி உள்ளிட்ட பொருட்களில் சட்னி மற்றும் இட்லி பொடி, நல்லெண்ணெய் என வாடிக்கையாளர்களுக்கு வழங்கப்படுகிறது. வீட்டில் ஒரு இட்லி கூட சாப்பிடாத குழந்தை இங்கு வந்தால் குறைந்த பட்சம் 4 இட்லி சாப்பிடுவதாக இந்த கடையின் உரிமையாளர் பெருமையுடன் தெரிவித்துள்ளார்.

இதுவரை இந்த கடைக்கு விடுமுறையே விடப்பட்டதில்லை என கூறப்படுகிறது. மேலும் நஷ்டம் என்பதே இல்லை என்பதோடு சேவை அடிப்படையில் கடையை தொடர்ந்து நடத்தி வருவதாக கடையின் உரிமையாளர் தெரிவித்துள்ளார். பார்சல் வழங்கினால் கெட்டுப்போய்விடும் என்பதால் இந்த கடையில் பார்சல் தவிர்க்கப்படுகிறது. தினமும் இரவு 7 மணி முதல் 9 மணி வரை மட்டுமே இந்த இட்லி கடை செயல்படுகிறது.