திமுக எம்.பி ஆ.ராசாவின் மனைவி உடல்நலக்குறைவால் காலமானார்..! அரசியல் தலைவர்கள் இரங்கல்..!

திமுக எம்.பி ஆ.ராசாவின் மனைவி பரமேஸ்வரி உடல்நலக்குறைவால் காலமானார்.

திமுக துணைப் பொதுச்செயலாளரும், மக்களவை உறுப்பினருமான ஆ.ராசா மனைவி பரமேஸ்வரி மார்பக புற்றுநோய் காரணமாக மருத்துவமனையில் சிகிச்சை பெற்று வந்தார். சமீபத்தில் குரோம்பேட்டையில் உள்ள ரெலா மருத்துவமனையில் மேல் சிகிச்சைக்காக அனுமதிக்கப்பட்டார். ஆ.ராசா மருத்துவமனையில் இருந்து மனையின் சிகிச்சைகளை கவனித்து வந்தார்.

சிகிச்சை பெற்றுவந்த பரமேஸ்வரியின் உடல்நிலை குறித்து முதல்வர் மு.க.ஸ்டாலின், எம்.எல்.ஏ. உதயநிதி ஸ்டாலின் ஆகியோர் மருத்துவமனைக்கு நேரில் சென்று கேட்டறிந்தனர். முன்னதாக ரெலா மருத்துவமனை வெளியிட்ட அறிக்கையில் பரமேஸ்வரியின் உடல்நிலை கவலைக்கிடமாக உள்ளதாகவும், வெண்டிலேட்டர் உதவியுடன் அவர் சிகிச்சை பெற்று வருவதாகவும் தெரிவிக்கப்பட்டது.

இந்நிலையில் இன்று (29.05.2021) மாலை சுமார் 7 மணியளவில் ஆ.ராசாவின் மனைவி பரமேஸ்வரி உயிரிழந்ததாக மருத்துவமனை நிர்வாகம் தெரிவித்துள்ளது. இவரது இறுதிச்சடங்கு பெரம்பலூரில் நடைபெறும் என தகவல் வெளியாகியுள்ளது. இந்த நிலையில் ஆ.ராசாவின் மனைவி பரமேஸ்வரி மறைவுக்கு அரசியல் தலைவர்கள் பலரும் இரங்கல் தெரிவித்து வருகின்றனர்.