‘எதர்ச்சையா.. நீங்கவேற எல்லாம் பக்கா ப்ளான்’!.. அசால்ட்டா பேசி ‘அசரவைத்த’ பர்த்டே பாய்.. நீங்க ‘வேறலெவல்’ தம்பி..!

இலங்கைக்கு எதிரான முதல் ஒருநாள் போட்டியில், களமிறங்கிய முதல் பந்திலேயே சிக்சர் அடித்த சிக்ரெட்டை இஷான் கிஷன் பகிர்ந்துள்ளார்.

இந்தியா மற்றும் இலங்கைக்கு இடையேயான முதல் ஒருநாள் போட்டி நேற்று கொழும்பு மைதானத்தில் நடைபெற்றது. இதில் டாஸ் வென்று முதலில் பேட்டிங் செய்த இலங்கை அணி, 50 ஓவர்களில் 9 விக்கெட் இழப்புக்கு 262 ரன்களை எடுத்தது. அதிகபட்சமாக கருணாரத்னே 43 ரன்கள் அடித்து கடைசி வரை ஆட்டமிழக்காமல் இருந்தார்.

இதனை அடுத்து 263 ரன்கள் அடித்தால் வெற்றி என்ற இலக்குடன் இந்திய அணி விளையாடியது. தொடக்க ஆட்டக்காரர்களாக கேப்டன் ஷிகர் தவான் மற்றும் பிரித்வி ஷா களமிறங்கினர். இதில் பிரித்வி ஷா 24 பந்துகளில் 43 ரன்கள் அடித்து அவுட்டாக, அடுத்து வந்த இஷான் கிஷன் 42 பந்துகளில் 59 ரன்கள் அசத்தினார்.

இதனைத் தொடர்ந்து பேட்டிங் செய்த மனிஷ் பாண்டே 26 ரன்களும், சூர்யகுமார் யாதவ் 31 ரன்கள் எடுத்தனர். இதனால் 36.4 ஓவர்களில் 263 ரன்கள் எடுத்து இந்திய அணி அபார வெற்றி பெற்றது. இதில் அதிகபட்சமாக கேப்டன் ஷிகர் தவான் 86 ரன்கள் அடித்து கடைசி வரை ஆட்டமிழக்காமல் இருந்து அசத்தினார்.

இந்த நிலையில் இந்திய அணியின் அறிமுக வீரர் இஷான் கிஷன், தான் எதிர்கொண்ட முதல் பந்தையே சிக்சருக்கு விளாசினார். இதுகுறித்து போட்டி முடிந்தபின் இஷான் கிஷனிடம் கேள்வி எழுப்பப்பட்டது. இதற்கு பதிலளித்த அவர், ‘எனக்கு களமிறங்க வாய்ப்பு கிடைத்தால், முதல் பந்திலேயே சிக்ஸ் அடிப்பேன் என டிரெஸ்ஸிங் ரூமில் இருக்கும்போது அனைவரிடமும் கூறியிருந்தேன். அதனால், நான் அப்படிதான் அடிப்பேன் என முன்பே எல்லோருக்கும் தெரியும். என்னுடைய பிறந்த நாளில் முதல் ஒருநாள் போட்டியில் விளையாடியது மகிழ்ச்சியாக உள்ளது’ என இஷான் கிஷன் சாதாரணமாக பதிலளித்தார்.

இப்போட்டியில் ஆரம்பம் முதலே அதிரடி காட்டிய இஷான் கிஷன், 42 பந்துகளில் 2 சிக்ஸர், 8 பவுண்டரிகள் அடித்து 59 ரன்கள் குவித்தார். முன்னதாக இங்கிலாந்துக்கு எதிரான டி20 போட்டியில் அறிமுக வீரராக களமிறங்கிய இஷான் கிஷன் அரைசதம் அடித்து அசத்தியிருந்தார். இதன்மூலம் அறிமுக டி20 மற்றும் ஒருநாள் போட்டியில் அரைசதம் அடித்த முதல் இந்திய வீரர் பெருமையை இவர் அடைந்துள்ளார். அதேபோல் இஷான் கிஷன், நேற்று தனது 23-வது பிறந்த நாளை கொண்டாடினார் என்பதும் குறிப்பிடத்தக்கது.