Video: நாங்க தோற்கவா ‘சாமிய’ கும்டுறீங்க.. ரெண்டே பந்தில் சோலிய முடிச்ச ஜடேஜா.. செம ‘வைரல்’!

கொல்கத்தா அணிக்கு எதிரான போட்டியில் சென்னை அணி த்ரில் வெற்றி பெற்றது.

இப்போட்டியில் சென்னை சூப்பர் கிங்ஸ் மற்றும் கொல்கத்தா நைட் ரைடைரஸ் அணிகள் மோதின. இதில் டாஸ் வென்ற சென்னை அணி முதலில் பந்து வீச்சை தேர்வு செய்தது. அதன்படி பேட்டிங் செய்த கொல்கத்தா அணி 20 ஓவர்களில் 5 விக்கெட் இழப்புக்கு 172 ரன்களை எடுத்தது. இதில் அதிகபட்சமாக நிதிஷ் ரானா 87 ரன்கள் அடித்து அசத்தினார்.

சென்னை அணியை பொருத்தவரை லுங்கி நிகிடி 2 விக்கெட்டுகளும், மிட்சல் சான்ட்னர், ஜடேஜா, கரன் ஷர்மா தலா 1 விக்கெட் எடுத்தனர். இதனைத் தொடர்ந்து 173 ரன்கள் எடுத்தால் வெற்றி என்ற இலக்குடன் சென்னை அணி விளையாடியது.

இதில் தொடக்க ஆட்டக்காரர் ருதுராஜ் கெய்க்வாட் 72 ரன்கள் அடித்து அசத்தினார். அடுத்து வந்த அம்பட்டி ராயுடு 38 ரன்களில் அவுட்டாக, கேப்டன் தோனி 1 ரன்னில் அவுட்டாகி அதிர்ச்சி அளித்தார். இந்த நிலையில் ஜோடி சேர்ந்த ஜடேஜா, சாம் குர்ரன் கூட்டணி அணியின் வெற்றி பொறுப்பை கையில் எடுத்தது.

இந்தநிலையில் கடைசி 2 பந்துகளில் 7 ரன்கள் எடுத்தால் வெற்றி என்ற நிலை இருந்தது. அப்போது களத்தில் நின்ற ஜடேஜா அடுத்தடுத்து இரண்டு சிக்ஸர்களை விளாசி சென்னை அணியை வெற்றி பெற வைத்தார். முதல் 4 பந்துகளில் 3 ரன்கள் மட்டுமே எடுத்திருந்த ஜடேஜா, அடுத்த 7 பந்துகளில் 28 ரன்கள் விளாசி தள்ளினார். சென்னை அணிக்கு எதிரான போட்டியில் ஏற்பட்ட தோல்வியின் மூலம் கொல்கத்தா அணியின் ப்ளே ஆஃப் கனவு தகர்ந்துள்ளது.

கடைசி ஓவரின் போது சென்னை அணி தோற்க வேண்டும் என கொல்கத்தா அணியின் உரிமையாளர்கள் கடவுளை வேண்டிக்கொண்டனர். இந்த புகைப்படம் தற்போது சமூக வலைதளங்களில் வைரலாகி வருகிறது.