ரசிகர்கள் ஆவலுடன் எதிர்பார்த்திருக்கும் மெகா ‘ஐபிஎல்’ ஏலம்.. எப்போ, எங்கே நடக்கப்போகுது தெரியுமா..?

ஐபிஎல் மெகா ஏலம் நடைபெற உள்ள தேதிகள் குறித்து தகவல் வெளியாகியுள்ளது.

இந்த ஆண்டு ஐக்கிய அரபு அமீரகத்தில் நடந்த 14-வது சீசன் ஐபிஎல் தொடரில், சென்னை சூப்பர் கிங்ஸ் அணி சாம்பியன் பட்டத்தை வென்றது. இதனை அடுத்து ஆண்டு முதல் அகமதாபாத், லக்னோ என்ற 2 புதிய அணிகள் இணைய உள்ளன. அதனால் அனைத்து அணிகளும் கலைக்கப்பட்டு மெகா ஐபிஎல் ஏலம் நடைபெறவுள்ளது.

இதனிடையே ஒவ்வொரு அணியும் தங்கள் அணியில் ஏற்கனவே விளையாடிய 4 வீரர்களை தக்க வைத்துக்கொள்ள பிசிசிஐ அனுமதி வழங்கியது. அதன்படி அனைத்து அணிகளும் தங்கள் தக்க வைத்த வீரர்களின் பட்டியலை சமீபத்தில் வெளியிட்டன.

இந்த நிலையில் ஐபிஎல் ஏலம் நடைபெற உள்ள தேதி குறித்த தகவல் வெளியாகியுள்ளது. வரும் 2022-ம் ஆண்டு பிப்ரவரி மாதம் 7 மற்றும் 8 ஆகிய தேதிகளில் ஐபிஎல் ஏலம் நடைபெற உள்ளதாக பிசிசிஐ வட்டாரங்கள் தகவல் தெரிவித்துள்ளன. இது பெங்களூரில் நடைபெறும் என தெரிவிக்கப்பட்டுள்ளது. ஆனாலும் இது குறித்த அதிகாரப்பூர்வ அறிவிப்பு இன்னும் வெளியாகவில்லை என்பது குறிப்பிடத்தக்கது.