RIP : காலையில் முன்னாள் வீரருக்கு இரங்கல்.. மாலையில் மாரடைப்பு.. காலமானார் சுழல் ஜாம்பவான் வார்னே

ஆஸ்திரேலியா கிரிக்கெட் அணியின் முன்னாள் வீரரும், சுழற்பந்து வீச்சில் ஜாம்பவானுமான ஷேன் வார்னே, தன்னுடைய 52 வயதில் உயிரிழந்துள்ள தகவல், ரசிகர்கள் மத்தியில் அதிர்ச்சியை ஏற்படுத்தியுள்ளது.

இதுகுறித்து, தற்போது வெளியிடப்பட்டுள்ள அறிக்கையில், தாய்லாந்தில் இருந்த வார்னே, சந்தேகத்திற்குரிய மாரடைப்பு ஏற்பட்டு, உயிரிழந்துள்ளதாக தெரிவிக்கப்பட்டுள்ளது.

கிரிக்கெட் உலகில் பல அரிய சாதனைகளை படைத்துள்ள வார்னேவின் மறைவு, கிரிக்கெட் ரசிகர்கள் மத்தியில் பேரதிர்ச்சியை உண்டு பண்ணியுள்ளது.

கிரிக்கெட் உலகின் சிறந்த விக்கெட்டுகள் அல்லது பந்துகள் எது என எடுத்துக் கொண்டால், வார்னேவின் சுழல் ஜாலத்துக்கு நிச்சயம் இடமுண்டு. இந்திய அணிக்கு எதிராக, கடந்த 1992 ஆம் ஆண்டு, சிட்னியில் வைத்து நடைபெற்ற டெஸ்ட் போட்டியில், ஆஸ்திரேலியா அணிக்காக ஷேன் வார்னே அறிமுகம் ஆனார்.

மொத்தம் 145 டெஸ்ட் போட்டிகளில் ஆடியுள்ள ஷேன் வார்னே, 708 விக்கெட்டுகளை எடுத்து பல்வேறு சாதனைகளை படைத்துள்ளார். சுழற்பந்து வீச்சில், தன்னுடைய மாயாஜாலத்தால், உலகளவிலான பல சிறந்த பேட்ஸ்மேன்களை திணற செய்தவர் ஷேன் வார்னே.

தன்னுடைய 15 ஆண்டு கால சர்வதேச கிரிக்கெட் பயணத்தில், ஆஸ்திரேலியா அணிக்காக பல்வேறு வெற்றிகளையும் பெற்றுக் கொடுத்துள்ளார். முன்னதாக, இன்று காலையில் ஆஸ்திரேலியா கிரிக்கெட்டின் மற்றொரு ஜாம்பவான் ராட் மார்ஷ் உயிரிழந்த போது, அவருக்கு அஞ்சலி செலுத்தி வார்னே ட்வீட் செய்திருந்தார்.

அதே நாளில், வார்னேவும் மாராடைப்பால் உயிரிழந்துள்ளது குறிப்பிடத்தக்கது.