தல அஜித்துடன் சீக்கிரமே ஒரு படத்தில் இணையவிருப்பதாக இயக்குநர் வெங்கட் பிரபு தெரிவித்துள்ளார்.
வெங்கட் பிரபு இயக்கத்தில் கடந்த 2011ம் ஆண்டு வெளியான திரைப்படம் ‘மங்காத்தா’. அஜித்தை வேறு ஒரு புதிய பரிமாணத்தில் ரசிகர்கள் பார்த்து மகிழ்ந்துக் கொண்டாடிய இப்படத்தின் இரண்டாம் பாகத்தில் தல ரசிகர்கள் மத்தியில் கூடுதல் எதிர்ப்பார்ப்பு நிலவுகிறது.
இந்நிலையில், சமீபத்தில் பொது நிகழ்ச்சி ஒன்றுக்கு சென்றிருந்த இயக்குநர் வெங்கட் பிரபுவிடம் தல ரசிகர்கள் ஆவலுடன் ‘மங்காத்தா 2’ குறித்த தகவல்களை கேட்டுள்ளனர். அதற்கு அவர் அதிரடியான பதிலை கூறி ரசிகர்களை உற்சாகத்தில் ஆழ்த்தியுள்ளார்.
இது பற்றி பேசிய வெங்கட் பிரபு, ‘மங்காத்தா 2’ படத்திற்கு அதிக எதிர்ப்பார்ப்பு உள்ளது. இப்படத்தை எடுக்கலாமா வேண்டாமா என்ற பயமும் இருக்கிறது. ஆனால், கண்டிப்பாக அஜித்துடன் ஒரு திரைப்படம் பண்ண ஆவலுடன் இருக்கிறேன். அது மங்காத்தா 2-வா என்பது தெரியவில்லை, ஆனால் விரைவில் அது நடக்கும் என்றும் வெங்கட் பிரபு தெரிவித்துள்ளார்.
வெங்கட் பிரபுவின் இந்த அறிவிப்பு தல ரசிகர்களை உற்சாகத்தில் ஆழ்த்தியுள்ளது. தற்போது போனி கபூர் தயாரிப்பில் ஹெச்.வினோத் இயக்கும் ‘பிங்க்’ திரைப்படத்தின் ரீமேக்கான ‘தல 59’ திரைப்படத்தில் அஜித் நடித்து வருகிறார். இதைத் தொடர்ந்து போனி கபூர் தயாரிப்பில் மேலும் ஒரு படத்தில் அஜித் நடிக்கிறார்.
அதேபோல், தற்போது வெங்கட் பிரபு சிம்பு நடிக்கவுள்ள ‘மாநாடு’திரைப்படத்தின் ஆரம்பக்கட்ட பணிகளில் பிசியாக இருந்து வருகிறார். மேலும், வெங்கட் பிரபு இயக்கியுள்ள ‘பார்ட்டி’ திரைப்படம் விரைவில் வெளியாகவுள்ளது.