வந்தாச்சு IPL 2019 கொண்டாட்டம்: மொதல்ல மோதப்போறது யாரு, எங்க? முழு விபரங்கள்!

ஐபிஎல் போட்டிகளுக்கான ரசிகர்களின் ஆர்வமான எதிர்பார்ப்பை பூர்த்திசெய்யும் விதமாக ஆரவாரமான போட்டி கால அட்டவணைகள் வெளியாகி ட்ரெண்டிங்கில் உள்ளன.

2019-ஆம் ஆண்டு மார்ச் மாதம் நெருங்கும்போது ஐபிஎல் போட்டிகளுக்கான அறிவிப்புகள் வெளியாகி உடனே போட்டிகள் தொடங்கப்படும் என முன்பே கூறப்பட்டிருந்த நிலையில், டி20 லீக் போட்டித் தொடரின் முதல் 2 வார போட்டிகளுக்கான அட்டவணை வெளியாகியுள்ளது. இதனால் இந்திய கிரிக்கெட் ரசிகர்கள்  குதூகலம் அடைந்துள்ளனர்.

முன்னதாக உலகம் முழுவதிலும் இருந்து வீரர்கள் ஐபிஎல் போட்டிகளில் விளையாடுவதற்காக வாங்கப்பட்டனர். இதனால் ஐபிஎல் போட்டிகள் இந்தியாவில் மட்டுமல்லாது, உலகம் முழுவதும் பிரபலமாகி பெருத்த வரவேற்பைப் பெற்றன. இந்த நிலையில், 12-வது ஐ.பி.எல் போட்டிகளில் விளையாடும் வீரர்களுக்கான ஏலம் கடந்த டிசம்பரில் ஜெய்ப்பூரில் நடந்தது.

இதில் கிங்ஸ் லெவன் பஞ்சாப் அணியின் கீழ் தமிழக வீரர் வருண் சக்கரவர்த்தி ரூ.8.40 கோடிக்கு அதிகபட்சமாக எடுக்கப்பட்டார். இதேபோல் மொஹித் சர்மா ரூ.5 கோடிக்கு சென்னை சூப்பர் கிங்ஸ் அணிக்காக எடுக்கப்பட்டார். இவ்வாறு ஏலம் நிறைவடைந்த பின்னர் மற்ற தகவல்கள் வெளியிடப்படாமல் இருந்த நிலையில்,  இந்தியன் பிரீமியர் லீக் நிர்வாகம் 2019-ஆம் ஆண்டு மார்ச் 23-ஆம் தேதி தொடங்கி நடக்கவுள்ள ஐபிஎல் தொடருக்கான முதல் 2 வாரத்துக்கான (ஏப்ரல் 5-ஆம் தேதி வரை) கால அட்டவணையை தனது ட்விட்டர் பக்கத்தில் அதிகாரப்பூர்வமாக வெளியிட்டுள்ளது.

சென்னை சேப்பாக்கம் மைதானத்தில் நடைபெறவுள்ள  முதல் நாள் ஆட்டத்தில் சென்னை சூப்பர் கிங்ஸ் அணியும், ராயல் சேலஞ்சர்ஸ் பெங்களூரு அணியும் மோதவிருக்கின்றன. தோனி தலைமையிலான சென்னை சூப்பர் கிங்ஸ் அணி சென்னையில் விளையாடவுள்ளதால் இப்போதே ரசிகர்களின் கொண்டாட்டங்கள் களைகட்டத் தொடங்கியுள்ளன.