கால்பந்து மைதானத்தில் ‘தல’ தோனி.. இணையத்தைக் கலக்கும் வைரல் வீடியோ!

மும்பையில் தன்னார்வத் தொண்டு நிறுவனம் சார்பில் நடத்தப்பட்ட கால்பந்து போட்டியில் தோனி விளையாடிய வீடியோ சமூக வலைதளங்களில் வைரலாகி வருகிறது.

இந்திய கிரிக்கெட் அணியின் முன்னாள் கேப்டனும், விக்கெட் கீப்பருமான தோனி சர்வதேச கிரிக்கெட் அரங்கில் பல்வேறு சாதனைகளை நிகழ்த்தி வருகிறார். தோனி தலைமையிலான இந்திய அணி ஒருநாள் மற்றும் டி20 போட்டிக்கான உலகக் கோப்பையை வென்றது.

கடந்த ஆண்டு தோனியின் பேட்டிங் குறித்து பல்வேறு விமர்சனங்கள் வந்தன. அந்த விமர்சனங்களுக்கு பதிலளிக்கும் வகையில் ஆஸ்திரேலியாவில் நடந்த போட்டியில் அதிரடியான ஆட்டத்தை தோனி வெளிப்படுத்தினார். அதேபோல் நியூஸிலாந்துக்கு எதிரான போட்டியிலும் மின்னல் வேக ஸ்டெம்ப்பிங்கை செய்து அசத்தினார்.

கிரிக்கெட் போட்டிகள் இல்லாத நேரங்களில் டென்னிஸ், கால்பந்து போன்ற விளையாட்டுகளை  தோனி ஆர்வமாக விளையாடுவார். இதனைப் பார்க்க ரசிகர்கள் கூட்டம் அலைமோதும். சில மாதங்களுக்கு முன்பு ராஞ்சியில் நடந்த உள்ளூர் டென்னிஸ் போட்டியில் விளையாடி கோப்பையை வென்றுள்ளார்.

இந்நிலையில் மும்பையில் உள்ள தன்னார்வத் தொண்டு நிறுவனம் நடத்திய கால்பந்து போட்டியில் தோனி கலந்து கொண்டு விளையாடினார். இதனை பார்க்க ரசிகர்கள் பலர் அங்கே கூடிவிட்டனர்.  மேலும் தோனி கால்பந்து விளையாடியதை ரசிகர்கள் வீடியோவும் எடுத்துள்ளனர். இந்த வீடியோ தற்போது சமூக வலைதளங்களில் வெளியாகி வைரலாகி வருகிறது.