സത്യന്‍ അന്തിക്കാടിന്റെ മകന്‍ അനൂപ് സത്യന്‍ ആദ്യമായി സംവിധാനം ചെയ്ത ചിത്രം 'വരനെ ആവശ്യമുണ്ട്' തീയേറ്ററില്‍ പ്രദര്‍ശനം തുടരുകയാണ്. അതിനിടെ ചിത്രത്തിലെ ഡീലീറ്റ് ചെയ്യപ്പെട്ട ഒരു രംഗം അണിയറ പ്രവര്‍ത്തകര്‍ പുറത്തിറക്കി. കല്ല്യാണി പ്രിയര്‍ശനും ശോഭനയുമുള്ള ഒരു സീന്‍ ആണ് റിലീസ് ചെയ്തിരിക്കുന്നത്.
ചിത്രത്തില്‍ കല്ല്യാണി പ്രിയദര്‍ശന്റെ കഥാപാത്രത്തിന്റെ ഈഗോ വ്യക്തമാക്കുന്ന സീനുകളില്‍ ഒന്നാണിത്. ശോഭനയുടെ കഥാപാത്രത്തിന് മേജര്‍ ഉണ്ണികൃഷ്ണന്‍ എന്ന സുരേഷ് ഗോപിയുടെ കഥാപാത്രത്തോടുള്ള മനോഭാവവും ഈ സീനില്‍ വ്യക്തമാവുന്നു.
'ഫൈനല്‍ കട്ടിന് തൊട്ട് മുമ്പ് ഞങ്ങള്‍ക്ക് ഈ രംഗം നീക്കം ചെയ്യേണ്ടി വന്നു. ശോഭനയുടെയും സുരേഷ് ഗോപിയുടെയും കഥാപാത്രങ്ങള്‍ ആദ്യമായി പരിചയപ്പെടുന്നതിന് ശേഷം വരുന്ന രംഗമാണിത്. സിജു വില്‍സണുമായുള്ള കല്ല്യാണിയുടെ 'അറേഞ്ച് ഡേറ്റ്' കൂടിക്കാഴ്ച ഈ രംഗത്തിന് ശേഷമാണ്.' - വീഡിയോ പങ്കുവച്ച് കൊണ്ട് സംവിധായകന്‍ കുറിച്ചു.
ഫെബ്രുവരി ഏഴിനാണ് ചിത്രം റിലീസ് ചെയ്തത്. ദുല്‍ഖര്‍ സല്‍മാന്‍ നിര്‍മിച്ച ചിത്രത്തില്‍ അദ്ദേഹം പ്രധാന വേഷത്തില്‍ എത്തുകയും ചെയ്യുന്നുണ്ട്. കല്ല്യാണി പ്രിയദര്‍ശന്‍ ആദ്യമായി മലയാളത്തില്‍ നായികയാവുന്നു എന്ന പ്രത്യേകത കൂടി ചിത്രത്തിനുണ്ട്.