കയ്യില്‍ മൈലാഞ്ചി മൊഞ്ചുമായി നടി ഭാമ. താരത്തിന്റെ വിവാഹത്തിന് മുന്നോടിയായുള്ള മെഹന്തി ചടങ്ങ് ഇന്നവെ വൈകിട്ട് കോട്ടയത്ത് നടന്നു. വിന്‍സന്‍ കാസ് ഹോട്ടലില്‍ വച്ച് നടന്ന ചടങ്ങില്‍ അടുത്ത സുഹൃത്തുക്കളും ബന്ധുക്കളും മാത്രമാണ് പങ്കെടുത്തത്. ദുബായില്‍ ബിസിനസുകാരനായ ചെന്നിത്തല സ്വദേശി അരുണ്‍ ആണ് വരന്‍. ഭാമയുടെ സഹോദരിയുടെ ഭര്‍ത്താവിന്റെ സഹപാഠി കൂടിയാണ് അരുണ്‍. 30-ന് കോട്ടയത്തു വച്ചാണ് വിവാഹം.
വീട്ടുകാര്‍ ഉറപ്പിച്ച കല്ല്യാണമാണെങ്കിലും ഇപ്പോള്‍ പ്രണയിക്കുന്നതിന്റെ രസം ഒന്ന് വേറെ തന്നെയാണെന്ന് ഭാമ പറയുന്നു. വനിതയ്ക്ക് നല്‍കിയ അഭിമുഖത്തിലാണ് ഭാമ മനസ് തുറന്നത്. 'വിവാഹം ഉറപ്പിച്ച ശേഷമുള്ള പ്രണയം സുന്ദരമാണ്. ഈയൊരു സമയം എന്‍ജോയ് ചെയ്യുന്നതിന്റെ രസം വേറെയാണ്. അത് തിരിച്ചറിഞ്ഞ്കൊണ്ട് പരമാവധി ആസ്വദിക്കുകയാണ്.' - ഭാമ വനിതയോട് പറഞ്ഞു.
2007-ല്‍ വിനു മോഹനെ നായകനാക്കി ലോഹിതദാസ് സംവിധാനം ചെയ്ത നിവേദ്യത്തിലൂടെയാണ് ഭാമ സിനിമയിലെത്തുന്നത്. പിന്നീട് 2016 വരെ സിനിമയില്‍ സജീവമായിരുന്നു. മലയാളത്തിന് പുറമെ തമിഴ്, തെലുഗ്, കന്നഡ ചിത്രങ്ങളിലും ഭാമ നായികയായിട്ടുണ്ട്.