മലയാളികളുടെ പ്രിയ നടി ഭാമയുടെ വിവാഹ നിശ്ചയം കഴിഞ്ഞത് അടുത്തിടെയാണ്. ഇപ്പോഴിതാ വിവാഹ നിശ്ചയത്തിന്റെ ചിത്രങ്ങള്‍ ആരാധകര്‍ക്കായി പങ്കുവച്ചിരിക്കുകയാണ് താരം. ഭാമയുടെ ഫേസ്ബുക്ക് പേജിലൂടെയാണ് ചിത്രങ്ങള്‍ പോസ്റ്റ് ചെയ്തത്. ദുബായില്‍ ബിസിനസുകാരനായ ചെന്നിത്തല സ്വദേശി അരുണ്‍ ആണ് വരന്‍. കൊച്ചിയിലെ റമദ റിസോര്‍ട്ടിലായിരുന്നു ചടങ്ങുകള്‍.
വീട്ടുകാര്‍ ഉറപ്പിച്ച കല്ല്യാണമാണെങ്കിലും ഇപ്പോള്‍ പ്രണയിക്കുന്നതിന്റെ രസം ഒന്ന് വേറെ തന്നെയാണെന്ന് ഭാമ പറയുന്നു. വനിതയ്ക്ക് നല്‍കിയ അഭിമുഖത്തിലാണ് ഭാമ മനസ് തുറന്നത്. 'വിവാഹം ഉറപ്പിച്ച ശേഷമുള്ള പ്രണയം സുന്ദരമാണ്. ഈയൊരു സമയം എന്‍ജോയ് ചെയ്യുന്നതിന്റെ രസം വേറെയാണ്. അത് തിരിച്ചറിഞ്ഞ്‌കൊണ്ട് പരമാവധി ആസ്വദിക്കുകയാണ്.' - ഭാമ വനിതയോട് പറഞ്ഞു.
2007-ല്‍ വിനു മോഹനെ നായകനാക്കി ലോഹിതദാസ് സംവിധാനം ചെയ്ത നിവേദ്യത്തിലൂടെയാണ് ഭാമ സിനിമയിലെത്തുന്നത്. പിന്നീട് 2016 വരെ സിനിമയില്‍ സജീവമായിരുന്നു. മലയാളത്തിന് പുറമെ തമിഴ്, തെലുഗ്, കന്നഡ ചിത്രങ്ങളിലും ഭാമ നായികയായിട്ടുണ്ട്.